Навіны Навіны Беларусі

Беларуска-польская велавандроўка

Беларуска-польская велавандроўка

1637 Праглядаў Брэст
Беларуска-польскай велавандроўкай завяршыліся пад Брэстам і ў Польшчы Тыдзень еўрапейскай мабільнасці і дні без аўтамабіля, распавёў сябра Руху «За Свабоду», адзін з экскурсаводаў мерапрыемства Яўген Скрабутан.

«Берасцейскі рух „За ВелаБрэст“ разам з польскім Таварыствам „За развіццё вёскі Лабачэў Дужы і яго ваколіц“ ды Гарадскім домам культуры з Тэрэспаля арганізавалі турыстычны роварны ўзаемаабмен, падчас якога беларусы арганізавалі турыстычную велавандроўку па Берасці для каля 80 чалавек з Польшчы, а потым усе разам паехалі на экскурсію да палякаў», — распавёў Скрабутан.

Падзея, па ягоных словах, «важная тым, што суседнія прыгранічныя гарады даўно чакаюць безвізавага праезду ці хаця б магчымасці перамяшчацца на ровары праз мяжу».

«Ад гэтага найперш выйграла б Берасце, бо ў адрозненне ад Гародні тут пачынае развівацца турыстычная інфраструктура, шмат магчымасцей адпачынку і цікавостак для замежных гасцей», — упэўнены сябра Руху «За Свабоду».

Плюс, дадаў Скрабутан, «для берасцейцаў з’явілася магчымасць убачыць Тэрэспаль і ваколіцы па-за „Бедронкай“, „цыгарэтчыкамі“ і пунктам абмену валютаў: мы пазнаёміліся са звычайнымі людзьмі, каторыя шмат працуюць для свайго рэгіёну і супольнымі намаганнямі стараюцца яго адкрыць для гасцей».

«Пасля двухдзённай велавандроўкі з’явілася шмат новых кантактаў, незабыўных уражанняў і надзея, што вельмі хутка такія паездкі перастануць быць святочным выключэннем для нашага трансгранічнага рэгіёну», — заключыў актывіст Руху.

фота Stowarzyszenie na rzecz rozwoju miejscowości Łobaczew Duży i okolic

Аўтар: Вольга Быкоўская

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Апошнія навіны