Навіны Навіны Беларусі

Рух «За Свабоду» запатрабаваў увесці кантроль на мяжы Беларусі і Расіі

Рух «За Свабоду» запатрабаваў увесці кантроль на мяжы Беларусі і Расіі

2736 Праглядаў Мінск
Заява Руху «За Свабоду» з нагоды затрымання ўкраінскага грамадзяніна Паўла Грыба расійскімі спецслужбамі.

У канцы жніўня стала вядома пра знікненне маладога ўкраінца Паўла Грыба. Па сведчаннях сваякоў і самога Грыба, перададзеных праз адваката, ён быў затрыманы невядомымі ў Гомелі і пасля вывезены ў Краснадар. Там расійскія спецслужбы прад'явілі яму абвінавачванне ў тэрарызме. Да гэтага моманту ад беларускага боку няма поўнага афіцыйнага тлумачэння гэтых падзеяў.

Рух «За Свабоду» лічыць, што гэты інцыдэнт і адсутнасць адпаведнай рэакцыі уладаў ставіць пад сумнеў суверэнітэт Беларусі, псуе адносіны з Украінай і міжнародны аўтарытэт нашай краіны, дыскрэдытуе яе як тэрыторыю для бяспечнага знаходжання любых замежных грамадзянаў.

Мы патрабуем ад МУС неадкладна правесці поўнае і ўсебаковае расследаванне знікнення Паўла Грыба, па выніку якога прадставіць публічны даклад. Усе беларускія сілавікі, якія мелі адносіны да інцыдэнту, у выпадку пацвержання незаконнасці іх дзеянняў павінны быць пакараныя.

Рух «За Свабоду» таксама прапануе:

1. Увесці пашпартны кантроль на беларускім баку беларуска-расійскай мяжы (які дэ-факта ўжо дзейнічае па ініцыятыве расійскіх уладаў). Беларусь, беспадстаўна адмаўляючыся ад гэтага кроку, паслабляе абарону сваёй тэрыторыі, не можа гарантаваць бяспеку сваім жыхарам і замежным грамадзянам, якія знаходзяцца ў нашай краіне.

2. Ратыфікаваць Міжнародную канвенцыю для абароны ўсіх асоб ад гвалтоўных знікненняў. У адпаведнасці з арт. 3-4 канвенцыі, дзяржава, якая падтрымала дакумент абавязуецца забяспечыць раследванні гвалтоўных знікненняў, а таксама кваліфікацыю падобных правапарушэнняў як крымінальнага злачынства.

Рух «За Свабоду» патрабуе ад беларускіх уладаў вярнуцца ў міжнароднае прававое поле, здзейсніць крокі дзеля ўмацавання суверэнітэту і гарантаваць бяспеку беларускіх і замежных грамадзян на тэрыторыі нашай краіны ад пасяганняў замежных спецслужбаў.

Каментары наведвальнікаў

Імя: не абавязкова
E-mail: не абавязкова
Каментар:

Апошнія навіны