Навіны Навіны Беларусі

Міліцыя склала пратакол на актывіста Руху «За Свабоду», які не прысутнічаў на акцыі

Міліцыя склала пратакол на актывіста Руху «За Свабоду», які не прысутнічаў на акцыі

2418 Праглядаў Навагрудак
Пратакол за ўдзел у акцыі ў гонар паўстанцаў Каліноўскіх склалі на актывіста Руху «За Свабоду» Максіма Бабіна, які ў той дзень не быў у Свіслачы.

«Міліцыянты прыехалі да мяне дадому па месцу прапіскі. Мне пазванілі бацькі, і я сам падышоў у аддзяленне. Там я сустрэўся з участковым, які прапанаваў азнаёміцца з пратаколам, паказаў раздрукоўку фота з пашпарту», — распавёў сайту Pyx.by Максім Бабін.

У пратаколе, па ягоных словах, было сказана, што ён удзельнічаў у мерапрыемстве ў Свіслачы, гэтаму ёсць нейкія сведкі.

Бабін адмовіўся падпісваць пратакол. «Я сказаў, што мяне не было на акцыі. Кажу, вось да пратаколу далучаны дыск з фота, паглядзіце фота, зразумееце, што мяне не было», — дадаў актывіст.

Але гэта, па ягоных словах, міліцыянта не ўпэўніла.

Павестка прыйшла і брату Максіма Вадзіму Бабіну, які вучыцца ў Мінску. Менавіта да яго прыходзіў супрацоўнік КДБ некалькі месяцаў таму.

«Міліцыя рыхтуе пратаколы пад капірку. З такімі выпадкамі трэба абавязкова разбірацца», — сказаў сайту Pyx.by каардынатар Руху «За Свабоду» па Гродзенскай вобласці Вадзім Леван.

Ён лічыць гэта запужваннем актывістаў і кажа, што міліцыянтаў, якія складаюць падобныя пратаколы трэба прыцягваць да адказнасці.

Падобная гісторыя адбылася ў Мастах. Актывіст Руху «За Свабоду» з Мастоў Васіль Клімовіч сёлета не змог паехаць у Свіслач на ўшанаванне памяці паўстанцаў Каліноўскіх. Аднак гэта не перашкодзіла суду аштрафаваць яго на 9 базавых велічыняў (189 рублёў) за ўдзел у акцыі. 22 снежня Гродзенскі абласны суд разгледзіць скаргу на гэтае рашэнне.

Аўтар: Вольга Быкоўская

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Год Каліноўскага

Апошнія навіны