Навіны Навіны Беларусі

«Байкот-101» аспрэчвае афіцыйныя лічбы

«Байкот-101» аспрэчвае афіцыйныя лічбы

2764 праглядаў
Каардынатары кампаніі байкоту выбараў у Палату прадстаўнікоў у Фрунзенскай выбарчай акрузе № 101 Менску заявілі пра намер падаць скаргу аб непрызнаньні вынікаў выбараў у Цэнтравыбаркам, а потым і ў Вярхоўны суд.

Паводле афіцыйных дадзеных, на байкотнай 101-й акрузе ў Менску прагаласавала 58,8% выбарцаў. Аднак байкотныя назіральнікі сьцьвярджаюць, што, паводле іх падлікаў, прагаласавала 35,69% выбарцаў. Арганізатары кампаніі байкоту і назіраньня сьцьвярджаюць пра відавочную фальсыфікацыю яўкі. Намесьнік старшыні Руху «За Свабоду» Юрась Губарэвіч адзначыў, што спраўдзіць пэўныя лічбы даволі проста:

​​«На 62-тысячную акругу знайшлося практычна дзесяць тысяч чалавек разыходжаньня — паміж тым, што бачылі на свае вочы назіральнікі, і тым, што дэкляруюць камісіі. Гэта якраз выдатны момант, каб праверыць гэтыя выбары на сапраўднасьць і давесьці фальсыфікацыі. І ўлада, калі б яна была зацікаўленая, каб зьняць усе абвінавачаньні з боку незалежных назіральнікаў, якія, паводле Ярмошынай, нібыта з галавы ўзялі гэтыя нізкія лічбы яўкі, — яна мае цудоўную магчымасьць для праверкі дзеяньняў участковых камісіяў. А менавіта — праверыць рэгістрацыйныя аркушы. Альбо наяўнасьць гэтых подпісаў: калі яны сфальшаваныя, а сфальшаваны кожны другі, можна элемэнтарнай празвонкай пацьвердзіць наяўнасьць фальшаваньня і завышэньня яўкі. Гэта зрабіць вельмі проста».

Адзін з кіраўнікоў грамадзянскай кампаніі «Гавары праўду» Аляксандар Фядута адзначыў, што на 101-й акрузе было найбольш моцнае незалежнае назіраньне, былі закрытыя амаль што ўсе ўчасткі. Менавіта гэтая акруга была найбольш моцна закіданая ўлёткамі з заклікамі да байкоту. Таксама Фядута адзначыў моцны крэатыўны складнік і ролю моладзевай арганізацыі «Зьмена», лідэр якой Павал Вінаградаў арыштаваны і выйдзе на волю толькі 30 верасьня.

​​«Вынікам гэтага была тая лічба, якую мы атрымалі. Яна ніжэйшая за сярэдні паказчык па Менску. Я ня маю на ўвазе тыя лічбы, якія былі агучаныя спадарыняй Ярмошынай і кіраўнікамі акруговых камісіяў. Я маю на ўвазе тую лічбу, якую агучвала незалежнае назіраньне. І тое, што гэтая лічба меншая, сьведчыць пра тое, што праца нашая як прыхільнікаў байкоту ў 101-й акрузе была больш моцная,чым, на жаль, праца нашых калегаў. Тых, хто ўзяў на сябе адказнасьць за правядзеньне кампаніі байкоту ва ўсёй краіне. Байкот павінен быць актыўным».

​​Арганізатары байкоту ў адной акрузе зьбіраюцца скарыстаць назапашаны досьвед для будучых электаральных кампаніяў. Паводле намесьніка старшыні Партыі БНФ Ігара Лялькова, гэта быў прыклад яднаньня ў дзеяньні:

«Я думаю, што надалей дэмакратычныя сілы павінны ўлічваць гэты досьвед і павінны імкнуцца да таго, каб дэклярацыі пра адзінства не былі проста пустымі дэклярацыямі, як бы прыгожа яны ні былі напісаныя, а яны падмацоўваліся рэальнымі агульнымі дзеяньнямі, як гэта было падчас кампаніі «Байкот-2012». //Радыё "Свабода"

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Апошнія навіны