Навіны Навіны Руху

Трамвай у Барысаве: нязбытная мара ці блізкая рэальнасць?

Трамвай у Барысаве: нязбытная мара ці блізкая рэальнасць?

4717 Праглядаў Барысаў
Экспертная група пры грамадскай ініцыятыве «За чысты Барысаў!» распрацавала новую канцэпцыю гарадской мабільнасці свайго горада.

Як паведамляе barysau.by, гэтымі днямі выйшаў з друку досыць незвычайны дакумент — «Новая канцэпцыя гарадской мабільнасці для Барысава», распрацаваны экспертнай групай пры грамадскай ініцыятыве «За чысты Барысаў!». Фактычна, гэта ёсць альтэрнатыўны погляд на тое, як у перспектыве можа выглядаць гарадская транспартная інфраструктура.

Ва ўступным слове да «Новай канцэпцыі гарадской мабільнасці для Барысава» адзін з удзельнікаў даследчага праекта, каардынатар Руху «За Свабоду» па Мінскай вобласці Сяргей Салаш тлумачыць, чаму паўстала неабходнасць у распрацоўцы гэтага грамадскага дакумента:

«150-тысячны Барысаў — адзін з найбуйнейшых прамысловых цэнтраў Беларусі — з’яўляецца істотным транспартным вузлом рэгіянальнага значэння. Горад наш змяняецца і развіваецца, і гэтыя змены — эканамічныя, сацыяльныя і дэмаграфічныя — з’яўляюцца сур’ёзным выклікам для нашай агульнай будучыні. У апошняе дзесяцігоддзе ў горадзе ўсё больш яўна адчуваюцца праблемы, звязаныя з транспартам і транспартнай інфраструктурай. Гэтыя праблемы праяўляюцца, напрыклад, і ў перагружанасці аднапалосных аўтамабільных дарог па вуліцах ІІІ Інтэрнацыянала і Лапаціна ў Старым горадзе; і ў нездавальняючых прапускных магчымасцях аўтамабільных шляхоў паміж цэлым шэрагам буйных гарадскіх мікрараёнаў (паміж Лядзішчамі, вуліцамі Чалоўскай і Ватуціна; Старым горадам і Новабарысавам; Залінейным раёнам і астатняй часткай горада і інш.); і ў абцяжараным чыгуначнай перашкодай выездзе з Барысава ў бок Беразіно і г.зв. «маскоўскай трасы», а таксама ў накірунку Вілейка-Ашмяны.

Новая канцэпцыя гарадской мабільнасці, распрацаваная групай экспертаў і пададзеная на разгляд мясцовай грамадскасці, прадугледжвае рэканструкцыю састарэлай гарадской транспартнай інфраструктуры, а таксама будаўніцтва прынцыпова новых аб’ектаў, такіх як трамвайныя шляхі з Печаў у Стары горад, пабудову новага моста праз Бярэзіну, шэрагу пуцеправодаў і інш. Калі час, як вядома, гэта грошы, то мы прапануем эканоміць час жыхароў Барысава, а значыць — эканоміць нашыя грошы.

Прыблізны кошт рэалізацыі дадзенай канцэпцыі немалы і раўнаварты каля 150 млн. дал., што складае прыкладна паўтара гадавога гарадскога бюджэту альбо 9-10% Мінскага абласнога бюджэту. Але, уявіце сабе, што сумарныя эканамічныя выгоды ад рэалізацыі канцэпцыі яшчэ большыя! Акрамя таго, дадзены дакумент ёсць адказам на выклікі новага часу — падвышэнне сацыяльнай мабільнасці, змену структуры эканомікі, рост аўтамабілізацыі грамадства. Будзем ігнараваць гэтыя выклікі — застанемся на ўзбочыне часу; адкажам на іх — і наш горад атрымае шанец стаць канкурэнтаздольным і паспяховым у глабальным асяроддзі«.

Новая канцэпцыя гарадской мабільнасці — чарговы па ліку праграмны дакумент, распрацаваны і прадстаўлены грамадскай ініцыятывай «За чысты Барысаў!». Грунтоўная праца па апісанні гарадскіх праблемаў і фармаванні бачання нашай супольнай будучыні была распачатая яшчэ ў 2003, калі была падрыхтаваная «Альтэрнатыўная стратэгія развіцця Барысава і Барысаўскага рэгіёну». Праца атрымала свой працяг у іншых напрацоўках грамадскай ініцыятывы. Напрыклад, такіх як «Еўрапейскія перспектывы для Барысава» (2008 год). На чарзе — распрацоўка рэкамендацый па вырашэнні шэрагу іншых вострых гарадскіх праблемаў.

Вокладка і першыя старонкі дакумента «Новая канцэпцыя гарадской мабільнасці для Барысава»

Поўную pdf-версію дакумента можна спампаваць адсюль. Друкаваны варыянт дакумента бясплатна атрымаць можна, даслаўшы на barysau.naviny@gmail.com свой актуальны паштовы адрас з пазначэннем імя і прозвішча атрымальніка, а таксама кантактны тэлефон.

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Апошнія навіны